Şagirdin yandırıldığı məktəbdə çəkilişə mane oldular: "Müəllimlərə əvvəldən demişdi ki..." - Baku TV

Doqquzuncu sinif şagirdi öz sinif yoldaşına xəsarət yetirib.

Hadisə Bakının Yasamal rayonunda yerləşən 286 nömrəli məktəbdə qeydə alınıb.

İddialara görə, şagirdlər arasında əvvəllər də münaqişələr yaşanıb. Xəsarət yetirən şagirdin məsələ ilə bağlı müəllimlərə məlumat verməsinə baxmayaraq, problemin həllini tapmadığı bildirilir.

Məktəblilərdən birinin verdiyi məlumata görə, hadisəyə səbəb şagirdin sıxışdırılması olub:

“Deyilənə görə, uşağı əsəbiləşdiriblər, o da bunun əvəzini çıxmaq istəyib. Uşaqlar onu sıxışdırıblar. Şagird bununla bağlı direktora da deyib”.

Bakı Şəhər Təhsil İdarəsindən verilən məlumata görə, məktəb rəhbərliyi tərəfindən dərhal təcili tibbi yardım çağırılıb, şagirdin valideynlərinə və aidiyyəti qurumlara məlumat verilib:

“Məktəbdaxili araşdırma çərçivəsində şagirdlər və müəllimlərlə söhbət aparılır, məktəb psixoloqu tərəfindən zəruri dəstəkləyici tədbirlər həyata keçirilir”.

TƏBİB-dən bildirilib ki, 20 aprel 2026-cı il tarixində saat 10:15 radələrində Respublika Təcili və Təxirəsalınmaz Tibbi Yardım Mərkəzinə 286 nömrəli məktəbdən çağırış qeydə alınıb. Çağırış ünvanına təcili tibbi yardım briqadası cəlb olunub. 2011-ci il təvəllüdlü yeniyetmə yanıq xəsarətləri ilə Nərimanov Tibb Mərkəzinin nəzdindəki Yanıq Mərkəzinə hospitalizasiya edilib:

“Ona başın, üzün, boynun, gövdənin ön-yan səthlərinin hər iki yuxarı ətraflarının II-III dərəcəli termiki alov yanığı diaqnozu qoyulub. Hazırda pasiyentin müalicəsi Reanimasiya şöbəsində davam etdirilir, vəziyyəti ağır qiymətləndirilir”.

Daxili İşlər Nazirliyindən (DİN) qeyd olunub ki, 2010-cu il təvəllüdlü yeniyetmə 2011-ci il təvəllüdlü şəxsin üzərinə spirt tökərək alışqanla yandırıb.

Hadisəni törətməkdə şübhəli bilinən şəxs polis əməkdaşları tərəfindən saxlanılıb. Araşdırma aparılır.