“Adam iyrənir, bütün mikrobdur, baxan yoxdur” | Köhnə avtobuslar nə vaxt dəyişdiriləcək? - Baku TV

Ölkəmizdə gedişhaqqının artmasına baxmayaraq, bəzi avtobuslarda xidmət səviyyəsi hələ də qənaətbəxş deyil.

Son günlər müşahidə olunan yağıntılar bu nəqliyyat vasitələrinin istifadəyə yararsız olduğunu bir daha göstərib.

Vətəndaşların sözlərinə görə, köhnə avtobuslardan istifadə artıq təhlükəli hal alıb.

“Elə avtobus var ki, 5-6 oturacağı yoxdur”, “Yağışlı havalarda avtobusda oturmaq mümkün deyil. Oturacaqlar suyun içində olur”, – deyə sərnişinlər narazılıqlarını ifadə ediblər.

Məsələ ilə bağlı Azərbaycan Yerüstü Nəqliyyat Agentliyindən bildirilib ki, avtobus parkının mərhələli qaydada yenilənməsi prosesində 2025-ci il ərzində Bakıya 300-ə yaxın avtobus gətirilib, ölkə üzrə isə 800-dən artıq avtobusun yenilənməsi həyata keçirilib:

“2026-cı ildən xüsusi “İctimai Nəqliyyat” Məqsədli Büdcə Fondunun yaradılması və daşıyıcılarla “brutto-müqavilə” sisteminə keçid avtobus parkının ekoloji cəhətdən təmiz nəqliyyat vasitələri sayəsində yenilənməsini sürətləndirəcək. Hazırda özəl nəqliyyat şirkətləri tərəfindən ekoloji cəhətdən təmiz texnologiyalardan, yəni elektrik enerjisi və ya sıxılmış təbii qazdan istifadə edən müasir avtobusların ölkəyə gətirilməsi davam etdirilir. Həm Bakı, həm də ölkənin müxtəlif regionları yeni avtobuslarla təchiz olunur. Bakıətrafı qəsəbələr üzrə sərnişindaşıma keyfiyyətinin artırılması işləri də davam etdirilir. Daşıyıcılar tərəfindən yeni avtobusların alınması istiqamətində işlər aparılır”.