Ailəsini qətlə yetirən Əhməd yenidən hakim qarşısında | Məhkəmədən görüntülər

İkisi azyaşlı olmaqla ailəsinin beş üzvünü amansızlıqla qətlə yetirməkdə ittiham olunan Əhməd Əhmədovun cinayət işi üzrə ilk məhkəmə baxış iclası keçirilib.

Bakı Ağır Cinayətlər məhkəməsinin hakimi Səbinə Məmmədzadənin sədrliyi ilə keçirilən prosesdə dövlət ittihamçısı təqsirləndirilən Əhməd Əhmədovla bağlı prokurorluğun göndərdiyi qərarı elan edib.

Qərarda təqsirləndirilən şəxsin hadisəni anlaqsız vəziyyətdə törətdiyi və onun hazırda psixi xəstə olduğu bildirilir. Buna görə də, prokurorluq Əhməd Əhmədovun cəzadan azad edilib ixtisaslaşmış müalicə müəssisəsinə köçürülməsini məsləhət görüb.

Daha sonra hakim Səbinə Məmmədzadə Əhməd Əhmədovdan özünü təqsirli bilib-bilməməsini soruşub. Əhməd özünü təqsirli bilərək cinayəti anlaqsız vəziyyətdə törətdiyini deyib. Məhkəmədə sərbəst ifadə verməyinə gəlincə isə o, bundan imtina edib.

Növbəti proses iyulun 23-dək təxirə salınıb.