Allahla insan arasında vasitəçi olmalıdır? | Eyyub Yaqubov sufizmə gələn tənqidlərdən danışdı - AMİN

“Amin” verilişinin yeni buraxılışında Xalq artisti Eyyub Yaqubovla təsəvvüf mövzusunda fikir mübadiləsi aparılıb.

Onun sözlərinə görə, təsəvvüf və sufilik İslamın ayrılmaz tərkib hissəsidir:

“Yəni sufilik islamın mahiyyətindən doğur. Yunus Əmrə “nə qədər “Quran”ı əzbərləsən də, onun mahiyyətini başa düşməyəcəksən” deyirdi. Çünki kamil bir insan sənə onun mahiyyətini açmalıdır ki, dərk edəsən. İnsanın həyatdakı mərhələli inkişafı üçün bu, lazımlıdır”.

Eyyub Yaqubov həmçinin insanın ruhu ilə nəfsi arasındakı mübarizədən danışıb:

“İnsanın bədənində bir-birinə zidd iki “vücud” – ruh və nəfs mövcuddur. Onlar daim bir-biri ilə mübarizə aparır. Bütün gözəlliklər ruhda, neqativ hallar isə nəfsdə cəmləşib. Ona görə də Ramazan ayında nəfsimizi cilovlayırıq ki, ruhumuz inkişaf etsin. Allahın insana üfürdüyü ruh əmanətdir. İnsan onu dünyada olduğu müddətdə Allaha qaytarmalıdır”.