Ana olmağa hazırlaşanları ən çox maraqlandıran sual | Oruc tutsanız...

Ana olacaq qadınları ən çox maraqlandıran suallardan biri də hamiləlik zamanı oruc tutmağın mümkün olub-olmamasıdır.

Türkiyəli mütəxəssis, ginekoloq Nur Dokuzeylül Güngörün sözlərinə görə, oruc tutaraq uzun müddət ac və susuz qalmaq doğuş qüsurları, inkişaf geriliyi və vaxtından əvvəl doğuş kimi bəzi risklər yarada bilər.

Oruc tutmağın hamiləliyin ilk və son aylarında yaradacağı təsirlər bir-birindən fərqlidir. Xüsusilə, ilk üç ay körpənin əsas orqanlarının inkişafında kritik bir dövr olduğu üçün daha təhlükəli ola bilər. Bu dövrdə qeyri-kafi qidalanma və maye itkisi anadangəlmə qüsurlar, inkişaf geriliyi kimi ciddi sağlamlıq problemlərinə gətirib çıxara bilər.

Bundan əlavə, bu dövrdə ürəkbulanma, qusma və maye itkisi də daha tez-tez baş verə bilər. Az maye qəbul etmək isə hamiləlik zamanı təhlükəli vəziyyətlərdən biridir. Körpənin amniotik mayesi azala bilər ki, bu da onun sağlamlığına mənfi təsir göstərər.