Ana və qızı eyni anda məzun oldu | "Ailə qurmuşdum deyə təhsilim yarımçıq qalmışdı..." - Baku TV

Bu dəfə məzun libasını təkcə övladlar deyil, analar da geyiniblər. Eyni vaxtda məzun olan ana-bala – Aygün Qasımova və qızı Nərminə Qasımova təhsil müddətində bir-birinə dəstək olub, indi isə diplom sevincini birlikdə yaşayırlar.

Aygün Qasımova deyir ki, uzun illər ali təhsil almaq istəyib:

“11-ci sinfi bitirəndə universitetə sənəd vermişdim. Atam çox istəyirdi ki, riyaziyyatçı olum. Birinci ixtisas qrupunu seçmişdim və topladığım bal Politexnik İnstitutuna qəbul olmağa imkan verirdi. Amma atam istəyirdi ki, onun özü kimi Azərbaycan Dövlət Pedaqoji Universitetində riyaziyyat ixtisası üzrə təhsil alım. Sonra ailə qurdum və oxumaq arzum yarımçıq qaldı. Əslində, təhsil almaq həvəsi həmişə olub. Üç qızım var və onların dərsləri ilə daim özüm məşğul olmuşam. Qızım universitetə hazırlaşanda mənim üçün də belə bir fürsət yarandı. Həyat yoldaşım da dedi ki, oxumaq istəyirəmsə, arxamda dayanacaq və mənə dəstək olacaq”.

Nərminə Qasımova isə 2022-ci ildə Bakı Dövlət Universitetinin Hüquq fakültəsinə 638,4 balla qəbul olunduğunu bildirib:

“Anam məndən daha çox, gecə-gündüz çalışırdı. Düzünü desəm, mən onun qədər çox oxumamışam. Hazırlıqlara getmişəm və təxminən iki-üç il hazırlaşmışam. Anam isə mən 11-ci sinifdə oxuyanda cəmi beş-altı ay ərzində hazırlaşdı. Səhərlər çox erkən oyanıb birlikdə dərs oxuyurduq. Çünki səhər saatlarında hazırlaşmaq daha effektiv olurdu”.