Araik və digərlərinin məhkəməsində diqqətçəkən proses | Nələr yaşandı? - Baku TV

Bakı Apellyasiya Məhkəməsində Ermənistanın Azərbaycana qarşı hərbi təcavüzü nəticəsində çoxsaylı cinayətlərə görə Bakı Hərbi Məhkəməsi tərəfindən barələrində ittiham hökmü çıxarılan Ermənistan Respublikası vətəndaşları – Araik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərlərinin apellyasiya şikayətləri üzrə məhkəmə baxışı davam etdirilib.

Təqsirləndirilən David Babayan əvvəlki məhkəmə iclasında olduğu kimi, ona elan olunan ittihamlar üzrə özünü təqsirli bilmədiyini söyləyib.

Təqsirləndirilən Arkadi Qukasyanın müdafiəçiləri isə çıxışında arqumentlərini səsləndirib, onun barəsində verilmiş hökmün ləğv edilməsini və bəraət hökmünün çıxarılmasını məhkəmədən xahiş ediblər.

Dövlət ittihamını müdafiə edən prokuror Anar Ələkbərov qeyd edib ki, müdafiə tərəfinin qaldırdığı məsələ üzrə mövqe artıq daha əvvəl ifadə olunub. Vurğulanıb ki, təqdim olunan apellyasiya şikayətinin məzmunu Davit İşxanyanın çıxışı və müdafiəçi tərəfindən verilən apellyasiya şikayəti ilə mahiyyətcə eynidir. Buna görə də hər hansı hüquq pozuntusunun baş verməsi barədə iddialar əsassızdır.

Zərərçəkmiş şəxslərin nümayəndələri dövlət ittihamçısı ilə razı olduqlarını bildiriblər.

Daha sonra məhkəmə vəsatətə münasibət bildirib. Məhkəmənin qərarına əsasən, vəsatətlərdə qaldırılan məsələlər hazırkı mərhələdə baxılan işin predmeti və mahiyyəti ilə bağlı olmadığından təmin edilməyib.

Məhkəmənin növbəti iclası iyulun 10-da keçiriləcək.