Artıq çəkidən qurtulmağın ən təhlükəsiz yolu

Üzgüçülük artıq çəkidən qurtulmaq üçün ən zərərsiz və təhlükəsiz üsul hesab olunur.

Bu barədə rusiyalı tibbi ekspert Yekaterina Demyanovskaya yerli mediaya müsahibəsində məlumat verib.

Mütəxəssis qeyd edib ki, əlavə kaloriləri yandırmaq məqsədilə su aerobikası məşqlərinə də müraciət etmək olduqca səmərəlidir.

"Piylənmə probleminin həllinə ehtiyatla yanaşmaq lazımdır. İnsanın fiziki hazırlığı olmadığı halda, yüksək bədən kütlə indeksi ilə ağır məşqlər etməsi oynaqlarda zədələrə, ürək-damar sistemində ciddi fəsadlara və nəfəs darlığının kəskinləşməsinə gətirib çıxara bilər. Artıq çəki ilə mübarizənin əsasını qidalanma rejiminin tənzimlənməsi və fiziki hərəkətliliyin artırılması təşkil edir. Bu baxımdan aerobik məşqlər, yəni sakit və ritmik dözümlülük tələb edən hərəkətlər çox səmərəlidir. İlkin olaraq su aerobikası və üzgüçülük məşqlərinə başlamaq olar. Bu, kalori sərfiyyatı üçün ən təhlükəsiz variantlardan biridir", – deyə Demyanovskaya vurğulayıb.

Həmçinin bildirib ki, aerobika fəaliyyətlərinə heç bir əlavə ağırlıq olmadan düzənlik ərazidə yerimək də daxildir. Həkimin sözlərinə görə, ilkin mərhələdə həftə ərzində iki-üç saatlıq ümumi hərəkət kifayət edir.

Ekspert diqqətə çatdırıb ki, nəbzin dəqiqədə 110 vuruşu keçməməsi şərti ilə gündəlik 15-20 dəqiqəlik yavaş templə gəzintilərlə işə başlamaq mümkündür.