"Müxtəlif xəstəliklər yaradır" | Diabetin yaranmasına təsir edən amillər hansılardır? - Baku TV

Azərbaycanda diabet xəstələrinin əksəriyyətini 30 yaşdan yuxarı şəxslər təşkil edir. Rəsmi statistika göstərir ki, bu xəstəlikdən əziyyət çəkənlərin çoxu qadınlardır. Eyni zamanda xəstələrin 90 %-dən yuxarısında insulindən asılı olmayan diabet növü aşkarlanıb.

Dövlət Statistika Komitəsinin məlumatına görə, ölkədə qeydiyyatda olan 344 577 diabet xəstəsinin 27 326 nəfəri insulindən asılı, 317 251 nəfəri isə insulindən asılı olmayan şəkərli diabetdən əziyyət çəkir. Beləliklə, diabet xəstələrinin təxminən 92 %-i insulindən asılı olmayan diabet növünə malikdir.

Maraqlıdır ki, bu xəstəlik niyə sürətlə artır və xəstəliyin qarşısını almaq mümkündürmü?

Terapevt Zakir Quliyev bildirib ki, şəkərli diabetin artması tək Azərbaycanda deyil, bütün dünyada müşahidə olunur və bunun bir çox səbəbi var. Onun sözlərinə görə, əsas səbəblər piylənmənin artması, oturaq həyat tərzi, qidalanma faktorları və stresdir:

“Qadınlarda bu xəstəliyin daha çox aşkarlanmasının səbəbi onların profilaktik müayinələrə kişilərdən daha tez-tez gəlməsidir. Həmçinin menopauza dövründəki hormonal dəyişikliklər, qadınlar arasında oturaq həyat tərzinin və piylənmənin daha yayğın olması da risk faktorları sırasındadır.

Diabetlə mübarizənin ən doğru yolu həyat tərzini dəyişdirməkdir. Bunun üçün aktiv həyat tərzi sürülməli, mütəmadi idman edilməlidir. Qidalanma vərdişləri düzəldilməli, balanslı qidalanmaya üstünlük verilməli, fastfud məhsullarından və yüksəkkalorili qidalardan uzaq durulmalıdır”.