"Xəstələrin artmasının səbəbi..." | Diabet niyə qadınlar arasında daha çox yayılır? - Baku TV

Azərbaycanda diabet xəstələrinin əksəriyyətini 30 yaşdan yuxarı şəxslər təşkil edir. Rəsmi statistika göstərir ki, bu xəstəlikdən əziyyət çəkənlərin çoxu qadınlardır. Eyni zamanda xəstələrin 90%-dən yuxarısında insulindən asılı olmayan diabet növü aşkarlanıb.

Dövlət Statistika Komitəsinin məlumatına görə, ölkədə qeydiyyatda olan 344 577 diabet xəstəsinin 27 326 nəfəri insulinasılı, 317 251 nəfəri isə insulinasılı olmayan şəkərli diabetdən əziyyət çəkir.

Beləliklə, diabet xəstələrinin təxminən 92%-i insulinasılı olmayan diabet növünə malikdir. Maraqlıdır, bu xəstəlik niyə sürətlə artır və xəstəliyin qarşısını almaq mümkündürmü?

Mütəxəssislərin sözlərinə görə, bu tendensiya təkcə Azərbaycanda deyil, bütün dünyada müşahidə olunur.

Onlar bildirirlər ki, diabetin sürətlə yayılmasının əsas səbəbləri arasında piylənmənin artması, oturaq həyat tərzi, qeyri-sağlam qidalanma, metabolik sindrom və gündəlik stres amilləri yer alır.

Həkimlər qeyd edirlər ki, qadınlarda diabetin daha çox aşkarlanmasının səbəblərindən biri onların profilaktik tibbi müayinələrə kişilərlə müqayisədə daha tez-tez müraciət etməsidir. Bundan əlavə, hormonal dəyişikliklər, xüsusilə menopauza dövrü və piylənmənin daha geniş yayılması da qadınlar üçün əlavə risk faktorları hesab olunur.

Mütəxəssislər bildirilər ki, ikinci tip diabetin qarşısını almağın ən təsirli yolu həyat tərzini dəyişməkdir. Bunun üçün müntəzəm fiziki aktivlik, gündəlik gəzinti və idmanla məşğul olmaq, balanslı qidalanmaq, fastfud və yüksək kalorili qidalardan uzaq durmaq tövsiyə olunur.