Pleyeri seçin:
Autizmlə bağlı əsas problemlər gündəmə gətirildi - Baku TV
“İstərdim ki, autizm araşdırma mərkəzi bizim ölkəmizdə də olsun”.
Bu barədə Baku TV-yə açıqlamasında Autizmlə Mübarizə İctimai Birliyinin sədri Çiçək Məmmədli deyib.
O, ölkədə dövlət səviyyəsində fəaliyyət göstərəcək autizm araşdırma mərkəzinin yaradılmasını təklif edib:
“Türkiyədə autizm araşdırma mərkəzi dövlət səviyyəsində fəaliyyət göstərir. İstərdim ki, belə bir mərkəz bizim ölkəmizdə də olsun, orada bu sahədə təcrübəli mütəxəssislər çalışsın”.
Çiçək Məmmədlinin sözlərinə görə, belə mərkəzin yaradılması autizm spektr pozuntusunun düzgün diaqnozunun qoyulması və uşaqların uyğun istiqamətə yönləndirilməsi baxımından mühüm rol oynaya bilər.
O həmçinin autizmli uşaqların inklüziv təhsili ilə bağlı problemlərə diqqət çəkib:
“İnklüziv məktəblərdə autizmli uşaqların təhsil alması öz əksini tapmadı. İnklüziv məktəblər artıq bir-bir sıradan çıxmaq üzrədir”.
Birlik sədri hesab edir ki, araşdırma mərkəzində fəaliyyət göstərəcək pedaqoji komissiya uşağın hansı məktəbdə təhsil alacağını və hansı reabilitasiya müəssisəsinə yönləndiriləcəyini müəyyənləşdirməlidir.
Çiçək Məmmədli autizmli uşaqların reabilitasiyası ilə məşğul olan valideynlərə dövlət dəstəyinin göstərilməsini də təklif edib:
“Dövlət minimum əməkhaqqı verməlidir ki, valideyn uşağın reabilitasiyası ilə məşğul ola bilsin”.
Kopyalandı
Seçilmişlər
