Azərbaycan Ordusunun Laçına daxil olduğu gün | Qürurverici görüntülər - Baku TV

26 avqust Laçın Şəhəri Günüdür. Laçın Şəhəri Günü Azərbaycan Prezidenti İlham Əliyevin imzaladığı Sərəncama uyğun olaraq hər il avqustun 26-da təntənəli şəkildə qeyd olunur.

Əlamətdar günün bu tarixdə qeyd olunması Azərbaycan Ordusunun Laçın şəhərində 2022-ci il avqustun 26-da yerləşməsi ilə əlaqədardır. Həmin gün dövlət başçısı İlham Əliyev azərbaycanlıların Laçın şəhərinə qayıtması ilə bağlı xəbəri sosial şəbəkə hesabında elan edib.

"Bu gün, avqustun 26-da biz – azərbaycanlılar Laçın şəhərinə qayıtmışıq. Azərbaycan Ordusu Laçın şəhərinə yerləşdi. Zabux və Sus kəndləri nəzarətə götürüldü. Bütün laçınlıları və Azərbaycan xalqını bu münasibətlə təbrik edirəm. Yaşasın Laçın! Yaşasın Azərbaycan!", – deyə dövlət başçısının 2022-ci ilin bu günü paylaşdığı mətndə deyilir.

Beləliklə, avqustun 26-da Laçın şəhərində Azərbaycan Dövlət Bayrağı ucaldılıb. Ordu korpusunun komandiri general-mayor Kənan Seyidov Azərbaycan Ordusunun Laçın şəhərinə yerləşməsi ilə bağlı Silahlı Qüvvələrin Ali Baş Komandanı İlham Əliyevə məruzə edib.

Qeyd edək ki, Ermənistanın hərbi təcavüzü səbəbindən 30 ilə yaxın işğal altında qalan tarixi torpaqlarımız 44 günlük Vətən müharibəsində işğaldan azad olunub və Şanlı Zəfərə aparan hər bir gün Azərbaycan tarixinə qızıl hərflərlə yazılıb. Laçın şəhərinə qayıdan keçmiş məcburi köçkünlərin sayı isə ildən-ilə artır və bu istiqamətdə işlər davam etdirilir.