Bakı Şəhər Prokurorluğunda maarifləndirici tədbir

Bakı Şəhər Prokurorluğunda “Açıq qapı” günü və “Azərbaycan Prokurorluğu: Suverenliyin təminatında rolu” mövzusunda seminar təşkil olunub.

Bakı şəhər və tabe rayon prokurorluqlarının əməkdaşları, ali təhsil müəssisələrinin hüquqşünaslıq ixtisası üzrə təhsil alan tələbələri, habelə media nümayəndələri tədbirdə iştirak edib.

Seminarın əsas məqsədi hüquqşünaslıq ixtisası üzrə təhsil alan gənclərin peşəkar inkişafına dəstək vermək, prokurorluq orqanlarının fəaliyyəti ilə yaxından tanışlıq yaratmaq və cəmiyyətdə hüquqi maarifləndirməni artırmaqdır.

Tədbirdə maarifləndirmənin önəmi, prokurorluq orqanlarının müasir dövrdə qarşılaşdığı çağırışlar, həmçinin cəmiyyətlə effektiv əlaqələrin prokurorluğun fəaliyyətindəki rolu diqqətə çatdırılıb.

Eyni zamanda hüquqi nəzarət mexanizmlərinin rolu, qanunun aliliyinin təmin olunması üçün prokurorluq tərəfindən tətbiq olunan prosedurlar və istintaq proseslərinin səmərəliliyi barədə iştirakçılara məlumat verilib.