“Deyirlər ki, sənə düşmür” | Ağır xəsarətləri olan Raqilin əlilliyi niyə dayandırıldı? - Baku TV

Cəmi 24 yaşı var. Lakin gənc yaşında müharibənin ən ağır üzünü görüb, döyüş meydanında həyatını riskə atıb. Söhbət Raqil Hüseynovdan gedir.

O, Vətən müharibəsi zamanı Talış kəndi, Suqovuşan və Ağdam istiqamətlərində gedən döyüşlərdə iştirak edib. Cəmi üç ay əsgər kimi xidmət etsə də, həmin müddətdə ağır döyüşlərin iştirakçısına çevrilib.

Vətən müharibəsi iştirakçısı 2020-ci ilin oktyabrın 4-də minamyot mərmisinin partlaması nəticəsində ağır yaralanıb.

Döyüşlərdə iştirakına görə “Ağdamın azad olunmasına görə”, “Suqovuşanın azad olunmasına görə”, “Cəsur döyüşçü” və “Vətən müharibəsi iştirakçısı” medalları ilə təltif olunub. Lakin döyüş meydanında aldığı xəsarətlər onun həyatında sağalmaz izlər buraxıb.

Raqilin sözlərinə görə, hər iki əlindən ağır xəsarət alıb, barmaqları amputasiya olunub, sağ əlində sinir zədələnməsi var. Boğaz nahiyəsindən aldığı qəlpə yarası nəticəsində isə ciddi sağlamlıq problemləri yaranıb.

Müharibə iştirakçısının sözlərinə görə, əlillik ödənişi may ayından dayandırılıb. O bildirir ki, aldığı xəsarətlər və gündəlik həyatında üzləşdiyi məhdudiyyətlər davam etdiyi halda, əlillik statusunun niyə yenidən müəyyən edilmədiyini anlamır.

R.Hüseynov deyir ki, hazırda ailəsini dolandırmaq üçün fəhləlik edir: “Deyirlər ki, sənə əlillik düşmür. Küçələrə düşüb, fəhləlik edirəm. Anam əlildir, atam da işsiz. Pensiyamla dərmanımı alır, müalicəmi etdirirdim”.