İşlədiyin hər saata görə maaş | Yeni sistem kimlərə şamil olunacaq? - Baku TV

Azərbaycanda əməkhaqqının hesablanması və ödənilməsi qaydasında dəyişikliklər nəzərdə tutulur. Bu barədə Milli Məclisin İqtisadi siyasət, sənaye və sahibkarlıq komitəsinin iclasında məlumat verilib.

Təklif olunan yeni mexanizmə əsasən, saatlıq əməkhaqqı sisteminin tətbiqi, eləcə də əməkhaqqı və digər ödənişlərin elektron sistem vasitəsilə işçilərin bank və ya elektron hesablarına köçürülməsi nəzərdə tutulur.

Millət vəkili Azər Badamov bildirib ki, dəyişikliklərin əsas məqsədi xüsusilə natamam iş vaxtı ilə çalışan, mövsümi işlərə cəlb olunan və xidmət sahəsində fəaliyyət göstərən şəxslərin əmək hüquqlarını və minimum təminatlarını qorumaqdır.

Onun sözlərinə görə, saatlıq əməkhaqqı sistemi işçilərin faktiki işlədikləri vaxta uyğun ödəniş almasına imkan yaradacaq:

“Bu dəyişikliklər əmək münasibətlərinin müasir tələblərə uyğunlaşdırılması, əmək bazarında şəffaflığın artırılması və işçilərin sosial müdafiəsinin gücləndirilməsi baxımından mühüm əhəmiyyət daşıyır. Burada iki əsas istiqamət diqqəti cəlb edir: minimum saatlıq əməkhaqqı sisteminin tətbiqi və əməkhaqqı ilə digər ödənişlərin elektron sistem vasitəsilə həyata keçirilməsi”.

Deputat qeyd edib ki, saatlıq əməkhaqqı sisteminin bir aydan az müddətə bağlanan əmək müqavilələri və həftəlik iş vaxtı 20 saatdan çox olmayan işlər üzrə tətbiqi təklif olunur. Bu mexanizm mövsümi və qısamüddətli işlərdə çalışanlar üçün xüsusi əhəmiyyət daşıyır.

Azər Badamovun sözlərinə görə, təklif olunan yanaşma işçinin bir saatdan az işlədiyi hallarda belə minimum ödəniş təminatından məhrum edilməməsini, növbəti saatın isə tam saat kimi hesablanaraq ödənilməsini nəzərdə tutur.