“Onda bizə təyyarə alın, elə gedək!” | Tikinti şirkəti özbaşınalıq etdi, çəkilişdən sonra isə...

Xırdalan şəhərinin Nizami küçəsində piyadaların hərəkəti üçün nəzərdə tutulan səki tikinti şirkəti tərəfindən zəbt edilib.

Sakinlərin sözlərinə görə, 11 nömrəli məktəbin arxasında yerləşən köhnə tikililər sökülüb. Həmin ərazidə yeni bina, yoxsa fərdi evlərin inşa ediləcəyi isə hələlik məlum deyil. Məlum olan odur ki, tikinti şirkəti tərəfindən səkidə dirəklər basdırılıb və piyadaların hərəkəti üçün yer saxlanılmayıb. Nəticədə, sakinlər məcburən avtomobil yoluna çıxmalı olurlar ki, bu da onların həyatı üçün təhlükə yaradır.

Sakinlər məsələ ilə bağlı narazılıqlarını Baku TV ilə bölüşüblər.

“Bura səkidir. Tikinti şirkəti gəlib dirəkləri burada basdırıb. Yolumuz zəbt olunub, necə hərəkət edək?! Onda bizə təyyarə alın, elə gedək”, – onlardan biri söyləyib.

Digər bir vətəndaş isə bildirib:

“Tikinti şirkətinə dəfələrlə etiraz etmişəm. Uşaqlar məktəbə necə gedib-gəlsinlər? Yağış yağanda buradan sel keçir. Uşaqlar hərəkət edə bilmirlər”.

Qeyd edək ki, Baku TV-nin ərazidə çəkiliş aparmasından və məsələ ilə bağlı yerli icra hakimiyyətinə məlumat verilməsindən sonra müvafiq şəxslər əraziyə gəliblər. Sözügedən dirəklərin sökülməsinə başlanılıb.