Moped sürənlər bunları mütləq bilsin | Yeni qaydalar açıqlandı - Baku TV

“Yol hərəkəti haqqında” Azərbaycan Respublikasının Qanununda mopedlərin dövlət qeydiyyatına alınması, onlara dövlət qeydiyyat nişanının verilməsi və “A1” kateqoriyalı sürücülük vəsiqəsi əsasında idarə olunması müəyyən edilib. Təklif olunan qanun layihəsində isə bu dəyişikliklərdən irəli gələn əlaqəli qanunların uyğunlaşdırılması nəzərdə tutulur.

Bunu Milli Məclisin iyulun 7-də keçirilən plenar iclasında deputat Azər Badamov deyib.

“Bununla əlaqədar “Avtomobil yolları haqqında”, “Dövlət rüsumu haqqında” və “İcbari sığortalar haqqında” qanunlara müvafiq dəyişikliklər təklif edilir. Layihəyə əsasən, mopedlər avtomobil yollarından istifadə edən nəqliyyat vasitələri sırasına daxil edilir. Onların texniki baxışdan keçirilməsi, dövlət qeydiyyatına alınması, dövlət qeydiyyat nişanı və qeydiyyat şəhadətnaməsinin verilməsi, habelə sürücülük vəsiqəsinin verilməsi və dəyişdirilməsi ilə bağlı dövlət rüsumlarının tətbiqi müəyyən olunur.

Eyni zamanda qeydiyyata alınmış mopedlərin istifadəsi ilə bağlı üçüncü şəxslər qarşısında mülki məsuliyyətin icbari sığortalanması da nəzərdə tutulur. Bu dəyişikliklər mopedlərin yol hərəkətində tamhüquqlu iştirakçı kimi hüquqi tənzimlənməsini təmin etməklə yanaşı, yol hərəkəti təhlükəsizliyinin gücləndirilməsinə və bu nəqliyyat vasitələrinin istismarı zamanı yarana biləcək risklərin daha səmərəli idarə olunmasına xidmət edir”, – deyə deputat bildirib.