Kişiləri bu halda 500 manatadək cəza gözləyir? | Ailədaxili münasibətlər necə tənzimlənir? - Baku TV

Həyat yoldaşının evdən çıxmasına icazə verməmək sadəcə ailədaxili məsələdir, yoxsa hüquqi məsuliyyət yarada bilən davranış?

Mediada həyat yoldaşını evdən buraxmayan kişilərin 300 manatdan 500 manatadək cərimələnə biləcəyi ilə bağlı məlumatlar yayılıb.

Bəs bu iddialar nə dərəcədə doğrudur? Həyat yoldaşının evdən çıxmasına mane olmaqla bağlı qanunvericilikdə hansı tələblər nəzərdə tutulub?

Vəkil Sima Yaqubova bildirib ki, məişət zorakılığının qarşısının alınması haqqında qanunvericiliyə əsasən, zorakılığın formaları yalnız fiziki təsirlə məhdudlaşmır. Buraya iqtisadi, cinsi və psixoloji zorakılıq da daxildir:

“Qeyd olunan məsələ İnzibati Xətalar Məcəlləsinin 158-ci maddəsində öz əksini tapıb. Bu, məişət zorakılığının qarşısının alınması haqqında qanunvericiliyin tələblərinin pozulmasıdır. Burada söhbət təkcə qadının deyil, hər hansı ailə üzvünün və ya zorakılığa məruz qalan şəxsin psixoloji zorakılığa məruz qalmasından gedir. Buna görə də İnzibati Xətalar Məcəlləsinin 158-ci maddəsinə əsasən, 300 manatdan 500 manatadək cərimə nəzərdə tutulub.

18 yaşına çatmış hər bir şəxsin hərəkət azadlığı Konstitusiya ilə təmin olunan hüququdur. Buraya evdən çıxmaq, şəhərlər və ölkələr arasında sərbəst hərəkət etmək daxildir. Təbii ki, qanunla müəyyən edilmiş istisnalar nəzərə alınmaqla şəxsin hərəkət azadlığının onun iradəsinə zidd şəkildə məhdudlaşdırılması hüquqi məsuliyyət yaradır”.