“Ya acdırlar, ya da...” | Tülküləri paytaxt küçələrinə üz tutmağa nə vadar edir? - Baku TV

Adətən yaşayış məntəqələrindən uzaqda, meşəlik və kolluq ərazilərdə məskunlaşan tülkülər son zamanlar şəhərin mərkəzinə üz tuturlar. Son günlər mərkəzi parklarda, eləcə də yaşayış binalarının yaxınlığında bu canlıya tez-tez rast gəlinir.

Bəs tülküləri şəhər küçələrinə üz tutmağa vadar edən səbəblər nələrdir?

Azərbaycan Memarlıq və İnşaat Universitetinin Landşaft memarlığı kafedrasının assistenti Nigar Abdullayeva bildirir ki, yaşıllıq sahələrinin dəyişməsi, şəhərsalma prosesləri və təbii ərazilərin daralması bu prosesin başlıca səbəbləridir:

“Heyvanların təbii yaşayış arealının sərhədləri dəyişir. Bu həm iqlim dəyişikliyi və qışın mülayim keçməsi, həm də insanlarla tülkülərin məskunlaşma mühitinin kəsişməsi ilə bağlıdır. Digər tərəfdən isə şəhərdə qida tapmaq daha asandır. Parklarda və müxtəlif iaşə obyektlərinin ətrafında zibil qutularının olması tülküləri cəlb edir. Bu halın qarşısını almaq üçün vəhşi heyvanların əraziyə girişi məhdudlaşdırılmalıdır. Həmçinin zibil qutularının ağzı mütləq qapalı saxlanılmalıdır”.