Paytaxtın təhlükəli kanalizasiya qapaqları | Həll yolu nədir? - Baku TV

Paytaxtın bəzi küçə və prospektlərində kanalizasiya qapaqları təhlükə mənbəyinə çevrilib.

Belə ki, bəzi yollarda kanalizasiya qapaqlarının yol səthindən aşağıda yerləşməsi sürücüləri qəfil manevrlər etməyə məcbur edir. Bu isə avtomobillərin təkərlərinin və digər hissələrinin zədələnməsinə, bəzən isə ağır yol-nəqliyyat hadisələrinin baş verməsinə səbəb olur. Xüsusilə yağışlı havalarda və gecə saatlarında təhlükə daha da artır.

“Təhlükə yaradır. Maşına böyük ziyan dəyir. Hərəkət edərkən qəfil həmin çuxura düşürsən. Avtomobil zədələnir, təmir və amortizasiya xərcləri artır”, – sürücülərdən biri bildirib.

“Nə qədər deyirik, xahiş edirik, amma baxan yoxdur. Yolun ortası ilə gedərkən qəfil çuxura düşürsən. Üstəlik, yağış yağanda qapağın ətrafı su ilə örtülür, görmək mümkün olmur. Nəticədə həm avtomobilə, həm də sürücüyə ziyan dəyir, əlavə xərc yaradır”, – başqa bir sürücü deyib.