Bunları etsəniz, soğan sizi "ağlada bilməyəcək"

Amerikalı fiziklər gözyaşı tökmədən soğan doğramağın mümkün həll yolunu tapıblar.

Araşdırmanın nəticələri "arXiv"də dərc olunan məqalədə qeyd olunub.

Bildirilir ki, soğan kəsildiyi zaman gözlərin sinir uclarını qıcıqlandıran lakrimator olan “sin-propaneiol-S-oksid” də daxil olmaqla kükürdlə zəngin birləşmələrin qarışığı havaya qalxır.

Alimlər soğanın gözyaşardıcı təsirini minimuma endirmək üçün yüksəksürətli fotoşəkil və rəqəmsal görüntü korrelyasiya üsullarından istifadə etməklə onun kəsilmə prosesini tədqiq ediblər.

Məlum olub ki, iti bıçaq daha yavaş və daha az enerji ilə hərəkət edən zaman daha az damcı yaradır. Soğan küt bıçaqla kəsildikdə kəsici alət elastik enerji toplayaraq tərəvəzin içərisində təzyiq yaradır və qabığı əzir. Nəticədə membranlar partlayanda bu, daha tez baş verir, mikrodamlalar saniyədə 40 metrə qədər sürətlə ətrafa yayılır. Aerozollar havaya qalxdıqda daha da çox hissəciklər əmələ gətirərək parçalana bilirlər.

Küt bıçaq iti bıçaqdan 40 dəfə çox damcı əmələ gətirir və maksimum kəsmə sürəti hissəciklərin sayını minimuma nisbətən dörd dəfə artırır. Beləliklə, iti bıçaq və yavaş dilimləmə gözlərə daxil olan qıcıqlandırıcıların miqdarını azaltmış olur.