Bütün ailəsini qətlə yetirən Əhmədə bu qədər cəza veriləcək

Paytaxtda 5 nəfər ailə üzvünün qətlində şübhəli şəxs qismində istintaqa cəlb olunan Əhməd Əhmədov barəsində 4 ay müddətinə həbs qətimkan tədbiri seçilib.

Bu haqda qərar Xətai Rayon Məhkəməsində hakim Bəxtiyar Məmmədovun sədrliyi ilə keçirilən iclasda çıxarılıb.

Qeyd edək ki, dəhşətli hadisə fevralın 13-də paytaxtın Xətai və Suraxanı rayonlarının ərazisində qeydə alınıb. 25 yaşlı Əhməd Əhmədovun Günəşli qəsəbəsində yaşayan bacısı, 27 yaşlı Elmira Əhmədova və onun azyaşlı qızını, daha sonra isə Əhmədli qəsəbəsində yaşayan 52 yaşlı atası Mehman Əhmədov, anası, 47 yaşlı Pikə Əhmədova və 9 yaşlı qardaşını qətlə yetirməsinə əsaslı şübhələr əldə edilib.

Baş vermiş hadisə ilə bağlı Xətai rayon prokurorluğunda Cinayət Məcəlləsinin 120.2.4 (xüsusi amansızlıqla qəsdən adam öldürmə) və 120.2.7-ci (iki və ya daha çox şəxsi öldürmə) maddələri ilə cinayət işi başlanıb.