Dəniz və çay balıqları niyə yoxa çıxıb? - Ekspert səbəbləri açıqladı

Könlü balıq istəyənin quyruğu suda, ya da ayağı bazarda gərək. Lakin balıq mövsümü olsa da, bəzi balıqlar sözün əsl mənasında qeybə çəkilib. Piştaxtaları əsasən farel, sazan, beluqa kimi balıqlar bəzəyir.

Alıcıların sözlərinə görə, bazarda satılan balıqların hamısı göl balığıdır və dadsızdır.

Satıcılar isə deyirlər ki, xüsusilə kütüm, vobla və ilan balığı azdır: “İlan balığı ümumiyyətlə azalıb və dənə ilə satılır. 1 ədədinin qiyməti 3-4 manat arası dəyişir”.

Bəs Xəzərin balıqları niyə yoxa çıxıb?

Ekoloqların sözlərinə görə, son 50 ildə ölkəmizdə balıq istehsalı kifayət qədər azalıb.

Ekoloq Rövşən Abbasov bildirir ki, çaylarımızda suyun azalması, Xəzər dənizinin iqlim dəyişmələrinin təsiri altında dayazlaşması və qonşu ölkələrdən, xüsusilə Rusiyadan gələn çayların hədsiz dərəcədə çirklənməsi və bu çayların kürü tökmək üçün artıq məqbul olmaması kimi amillər Xəzər balıqçılığına çox ciddi ziyan vurub:

“Son 20 ildə Xəzər dənizində nərə balığı istehsalı demək olar ki, kvota ilə aparılır. Balıqçılığın inkişafı üçün xeyli tədbirlər görülür, xüsusilə süni balıq artımı məntəqələrini buna misal göstərmək olar. Bu məntəqələrdə yetişdirilən çömçəquyruqlar həyatlarının ilkin mərhələsində Xəzər dənizinə və oraya tökülən çaylara, xüsusilə Kür çayının aşağı hissəsinə buraxılır”.

Balıqların kürüləmə dövründə ovlanması növlərinin məhv olması ilə nəticələnə bilər. Mütəxəssislərin sözlərinə görə, Xəzərin biomüxtəlifliyinin və ekoloji sisteminin qorunması üçün müxtəlif fəaliyyətlər həyata keçirilməlidir.