“Deyir ki, evimə qoymurlar” | Küçədə yaşayan ana və oğlu ilə bağlı qurumlar nəyi açıqladı? - Baku TV

Sosial şəbəkələrdə Tovuz rayonunda 42 yaşlı qadının azyaşlı övladı ilə birlikdə parklarda gecələdiyini əks etdirən foto yayılıb.

Rayon sakinlərinin sözlərinə görə, Aybəniz Qasımovanın psixoloji problemləri var. O hətta 2021-ci ildə Qazax Rayon Psixiatriya Xəstəxanasında müalicə də alıb.

Sakinlər qeyd edirlər ki, ana və uşaq bəzən park ərazilərində, bəzən isə şəhərin müxtəlif yerlərində gecələyirlər. Qadın ailəsi ilə münasibətlərinin pozulduğunu və evə buraxılmadığını deyib.

“Bəzən yollarda, bəzən də şəhərin ortasında yatır. Deyir ki, evimə qoymurlar, ailəm sahib çıxmır”, – deyə sakinlərdən biri bildirib.

Məsələ ilə bağlı Tovuz Rayon İcra Hakimiyyətində xüsusi komissiya yaradılıb. Ana və azyaşlı övlad tapılaraq müvafiq qurumlara təhvil verilib.

Məlumata görə, Qasımova Aybəniz Arifqızı və oğlu Qasımov Ömər Cavidoğlu İcra Hakimiyyətinin nümayəndələri və polis əməkdaşları tərəfindən Tovuz Rayon Mərkəzi Xəstəxanasına gətirilib. Müayinə zamanı onların uzun müddət parklarda gecələdiyi müəyyən edilib.

Müayinələrin nəticələrinə əsasən, ana Qazax Rayon Psixiatriya Xəstəxanasına, uşaq isə Pediatriya şöbəsinə yerləşdirilib. Uşağa kəskin bronxit diaqnozu qoyulub, müalicəsi davam etdirilir.

Sosial Xidmətlər Agentliyindən bildirilib ki, uşağın gələcəkdə daimi qayğı ilə əhatə olunması üçün qanunvericiliyə uyğun tədbirlər görüləcək.