DİM açıqladı | Neçə nəfər qəbul imtahanından xaric olunub?

“Bu gün II və III ixtisas qrupları üzrə ali təhsil müəssisələrinə qəbul imtahanı keçirilib”.

Bu barədə Dövlət İmtahan Mərkəzinin sektor müdiri Xanlar Xanlarzadə məlumat verib.

O bildirib ki, imtahan 22 şəhər və rayonda təşkil olunub: “İlkin məlumatlara əsasən, 5 nəfərdə mobil telefon aşkarlandığı üçün imtahandan xaric olunub. Üzərində mobil telefon tutulduğu üçün imtahandan xaric olunanların müsabiqə nəticələri ləğv olunur və onlar qəbul imtahanının ikinci cəhdinə də buraxılmırlar”.

“İmtahanda 49 000-ə yaxın abituriyentin iştirakı nəzərdə tutulurdu. 64 nəfər sağlamlıq imkanları məhdud abituriyent də iştirak edib. Onların rahat şəkildə imtahan verməsi üçün zəruri şərait yaradılmışdır. İstifadə edilmiş test tapşırıqlarının (qapalı və kodlaşdırıla bilən açıq tipli) cavabları imtahandan dərhal sonra Mərkəzin saytına yerləşdirilib.

Mayın 27-dən etibarən DİM-də imtahan protokolları və materialların emalına başlanılacaq. İmtahanlarda istifadə olunan açıq tipli tapşırıqların yoxlanılması vaxt tələb etdiyindən nəticələrin yaxın 2 həftə ərzində elan olunması nəzərdə tutulur”, – o qeyd edib.