Əhmədin məhkəməsində qətlin motivi araşdırılmayacaq

Ailə üzvlərini amansızlıqla qətlə yetirməkdə təqsirləndirilən və hadisə zamanı anlaqsız vəziyyətdə olduğu istintaq zamanı sübuta yetirilən Əhməd Əhmədovun cinayət işi üzrə keçirilən ilk məhkəməsi zamanı onun qohumu iddialar ortaya atıb.

Özünü Əhmədin xalası kimi təqdim edən Şəfaqət Bədəlova ilk olaraq ibtidai istintaq dövründən Əhmədin qəyyumu kimi tanınan müvafiq icra hakimiyyətinin məhkəmədə iştirak edən nümayəndəsinə etirazını bildirib.

Şəfaqət Bədəlovanın bu hərəkəti məhkəmə tərəfindən qanun pozuntusu kimi qiymətləndirilərək prosesə sədrlik edən hakimin göstərişi ilə o, zaldan uzaqlaşdırılıb.

Əhmədlə bağlı cinayət işi anlaqsız vəziyyətdə ailə üzvlərini qətlə yetirən şəxsin cinayət işi kimi məhkəmə istintaqına verildiyindən hadisənin necə baş verməsinin motivləri məhkəmə istintaqının araşdırma predmeti olmayacaq. Məhkəmədə yalnız Əhmədin həqiqətən də bu hadisəni törədərkən anlaqsız olduğu araşdırılacaq. Bununla bağlı iddia olunan qəyyumluq və vərəsəlik məsələsi isə ikinci dərəcəli mövzular hesab olunur.

Qeyd edək ki, məhkəmə istintaqı aparılarkən sözügedən cinayət işi ilə bağlı istənilən mübahisəli məsələlərin məhkəmədən kənar ictimailəşdirilməsi məhkəməyə təzyiq kimi qiymətləndirilir.