Ermənilərin törətdiyi dəhşətli faciədən 31 il ötür

Bu gün Başlıbel qətliamının növbəti ildönümüdür.

Ermənilərin 1993-cü il aprelin 18-də Kəlbəcər rayonunun Başlıbel kəndində törətdiyi qətliamdan 31 il ötür.

1993-cü il aprelin ilk günlərində Kəlbəcər rayonunun işğalı zamanı 2 minə yaxın əhalisi olan Başlıbel kəndində 73 sakin evlərini tərk edə bilməyib. Onlar aprelin 2-də mühasirədən çıxmağa çalışarkən ermənilər 9 nəfəri qətlə yetirib, 5 nəfəri isə girov götürüb. Qalan 62 nəfər isə dağlara çəkilərək gizlənib.

Aprelin 18-də sakinlərin yerlərini aşkarlayan ermənilər hücum edərək daha 18 nəfəri qətlə yetirib, 14 nəfəri isə girov götürüblər. 1 nəfər itkin düşüb. Sağ qalmağı bacaran 30 nəfər 113 gün mühasirədə qalıb.

Nəhayət iyulun 17-də onlar ancaq gecə hərəkət edərək dağ yolları ilə mühasirədən çıxa biliblər.

Bu hadisələr zamanı yalnız 93 yaşlı Başlıbel sakini Ələsgər Kazımov doğma kəndini tərk etməyərək həyatını mühasirədə davam etdirib.

Qeyd edək ki, Kəlbəcər rayonu 44 günlük Vətən müharibəsi nəticəsində – 25 noyabr 2020-ci ildə işğaldan azad edilib.