Ət məhsullarının qiymətinin artma səbəbi | Heyvan saxlamaqdansa, taksi sürməyə üstünlük verilir

Hesablama Palatası ət və ət məhsullarının bahalaşmasının səbəblərini açıqlayıb.

Qurum bunu ölkədə damazlıq heyvandarlığın lazımi səviyyədə inkişaf etdirilməməsi ilə əlaqələndirib.

Eyni zamanda bildirilib ki, tələbatın idxal hesabına ödənilməsi səviyyəsi yüksəkdir. 2019-2023-cü illərdə iribuynuzlu və xırdabuynuzlu heyvanların sayı 12 faizə yaxın azalıb, idxalı 68 faizdən çox artıb.

Həmçinin örüş sahələri ilə yanaşı, yonca əkini sahələrinin becərilməsi üçün verilən subsidiyanın da azaldılması yem xərclərinin artmasına səbəb olub. Bir qrup mikro və kiçik fermer sahibkarın dövlət dəstəyindən faydalanması imkanı tamamilə məhdudlaşdırılıb.

İqtisadçı Xalid Kərimli deyir ki, xaricdən diri heyvan gətirilməsə, ölkədə ətin qiyməti daha yüksək ola bilər. Lakin xarici ölkələrdə heyvan xəstəlikləri, həmçinin qiymətlərin daha baha olması xaricdən gətirilən heyvanların da qiymətlərinə təsir göstərir. Qeyd edək ki, rəsmi statistikaya görə, 2024-cü ilin avqust ayında iyulla müqayisədə ən çox qiymət artımı mal və qoyun ətində, kolbasa məmulatlarında olub.