“Hamısını yeyir, heç biri tapılmayacaq!” - Balakəndə ortaya çıxan böyük təhlükə - Baku TV

Balakən rayonunda ağaclar ciddi təhlükə ilə üz-üzə qalıb. Sürətlə yayılan Ağ Amerika kəpənəyinin tırtılları yaşıllıq sahələrinə kütləvi ziyan vurur.

Sakinlərin sözlərinə görə, meşələrdə də vəziyyət eynidir. Zərərvericilər əvvəlcə ağacların üzərində tor əmələ gətirir, daha sonra qısa müddətdə yarpaqları və meyvələri yeyərək bitkilərin qurumasına səbəb olur.

Sakinlərdən biri bildirib ki, zərərvericilərlə mübarizə aparılsa da, nəticə əldə olunmur:

"Bəladır, gəlib başımıza. Öhdəsindən gəlmək olmur. Dərmanlayırlar, təmizləyirlər, amma nə qədər dərman vursalar da, yenidən ortaya çıxır. Keçən il də var idi, təmizləndi, yoxa çıxdı. Amma builki tamam başqadır. Dərman da təsir etmir. Hər şeyi yeyir. Yarpaqları məhv edir, sonra fındıq ağaclarına keçir. Bu, cökə ağacıdır. Bir həftəyə bundan əsər-əlamət qalmayacaq".

Başqa bir sakin isə vəziyyətin getdikcə ağırlaşdığını deyib:

"Bütün yaşıllığın içini basıb. Belə davam etsə, bir neçə ilə burada sağlam ağac tapmaq mümkün olmayacaq".