“Hələ nələr olacaq, onu Allah bilir" | Balaxanıda faciə: "Hamısında da elə vurublar ki..." - Baku TV

Sabunçu rayonunun Balaxanı qəsəbəsində, “İkinci Mədən” adlanan ərazidə təhlükəli vəziyyət hökm sürür.

Sakinlərin sözlərinə görə, ərazidə yol hərəkətinin təhlükəsizliyi üçün zəruri nişanlar və infrastruktur yoxdur. Belə ki, yolda piyada keçidi, dayanma və durma nişanları, həmçinin işıqlandırma sistemi mövcud deyil. Avtomobillər üçün sürət həddinin müəyyən edilməməsi də vəziyyəti daha da çətinləşdirir.

Sakinlər bildirirlər ki, bu səbəbdən ərazidə tez-tez yol-nəqliyyat hadisələri baş verir. Onların sözlərinə görə, bir neçə dəfə piyadaların vurulması ilə nəticələnən qəzalar olub, hətta ölüm və xəsarətlə nəticələnən hadisələr də qeydə alınıb.

Sakinlərdən biri bildirib ki, yolun mərkəzi istiqamətə gedən əsas yollardan birinə çevrilməsi ilə nəqliyyatın intensivliyi artıb:

“Bu yol artıq mərkəzi yola çevrilib, maşınlar ara vermir. Piyada keçidindən keçmək mümkün deyil. Üstəlik, ötmələr olur. Maşınlar dayananda ötməyə çıxan avtomobil gəlib qəza törədib. Burada yol qəzasında bir nəfər ölüb, dörd nəfər yaralanıb, bir neçə avtomobilə də ziyan dəyib. Ona görə də ilk növbədə ötmənin qadağan edildiyini bildirən nişan qoyulmalıdır. İkinci olaraq sürət həddi müəyyən edilməlidir. Çünki bu, qəsəbə yoludur. Məktəb açılandan sonra vəziyyətin necə olacağını təsəvvür etmək çətindir”.

Başqa bir sakin isə qeyd edib ki, yolun bir tərəfindən digər tərəfinə keçmək xüsusilə uşaqlar və yaşlılar üçün ciddi çətinlik yaradır:

“Vəziyyətimiz çox pisdir. Uşaqlarımız, qocalarımız yolun o biri tərəfinə keçməkdə çox çətinlik çəkirlər. Burada bir neçə uşaq vurulub. İki-üç ölüm hadisəsi olub. Demək olar ki, 10 gündən bir qəza baş verir. Xahiş edirik, aidiyyəti və səlahiyyətli qurumlar bizə kömək etsin. Heç olmasa, yolda sürət həddi müəyyənləşdirilsin”.