Hər yerə müraciət etmişik, amma... | Ölümlə üz-üzə qalan sakinlərin acınacaqlı vəziyyəti

Buzovna qəsəbəsi, Rasim İmanov küçəsində yerləşən yataqxana binası illərdir ki, uçma təhlükəsi ilə üz-üzədir.

Sakinlərin sözlərinə görə, külək şiddətlənən zaman fasaddan qopan daşlar yerə tökülür. Bu halda bədbəxt hadisələrin baş verməsi isə qaçılmazdır.

“Tavan çöküb, pəncərələrin hamısı çürüyüb tökülür. Çox pis vəziyyətdə yaşayırıq. Dəfələrlə əlaqədar qurumlara demişik, amma məşğul olmurlar. Elə bil gözləyirlər ki, hansısa qəza baş versin, kimsə ölsün”, – deyə sakinlər narazılıqlarını dilə gətiriblər.

Yataqxana binasının aqibəti ilə bağlı Xəzər Rayon İcra Hakimiyyətindən bildirilib ki, Tikintidə Təhlükəsizliyə Nəzarət Dövlət Agentliyinin rəyinə əsasən, bina texniki cəhətdən yararsız hesab edilib.

Bununla əlaqədar Rayon İcra Hakimiyyəti lazımi tədbirlər görür və bina sakinlərinin təhlükəsizliyinin təmin edilməsi üçün Mənzil-Kommunal Təsərrüfatı Birliyinə və digər aidiyyəti qurumlara müraciətlər ünvanlanıb. Binanın nə vaxt söküləcəyi isə məlum deyil.