Hesabına pul köçürüldü, amma geri qaytardı

Türkiyə mediasının ard-arda haqqında reportajlar hazırladığı 26 yaşlı Musa Musazadə Şəkinin ucqar kəndlərindən biri Çay Qaraqoyunludandır. O, 2018-ci ildə Qaziantep Universititetinin dil-ədəbiyyat fakültəsini bitirib. Təhsil aldığı müddətdə birgə oxuduğu Merve xanımla ailə qurub.

Vətənə olan borcunu Azərbaycanda xüsusi təyinatlı dəstədə hərbi xidmətlə ödəyən Musa yenidən Türkiyəyə qayıdıb və hazırda orada yaşayır. Musa Musazadə Qaziantep şəhərində qeydiyyatda olduğundan Türkiyədə baş verən zəlzələyə görə onun hesabına 10 min türk lirəsi pul köçürülüb. Pulu qəbul etməyən Musa isə dərhal aidiyyəti qurumlara məlumat verib.

Valideynləri övladlarının etdiyi hərəkətlə fəxr etdiklərini bildirirlər. Onlar Musanın bu təqdirəlayiq addımını sevinclə qarşılayıblar. Türkiyənin bu ağır vaxtında ehtiyacı olmayan pulu almadığına görə ona təşəkkür ediblər.

M.Musazadə hazırda İstanbulda yaşayır. Müvəqqəti olaraq işləmir. Nəzərə alaq ki, əgər Musa 10 min lirəni qəbul etsəydi, növbəti mərhələdə ona 15 min, sonra isə ailəli olduğu üçün ev də veriləcəkdi. Ancaq o, atdığı addımla Azərbaycan xalqının hər bir üzvünün Türkiyənin yanında olduğunu bir daha göstərdi.