İkinci qrup əlil pensiyasının kəsilməsindən narazıdır- Baku TV

Baku TV-nin qaynar xəttinə müraciət edən Ağdam rayon sakini Ziyəddin İsmayılov 13 ildir aldığı əlillik pensiyasının kəsilməsindən şikayətlənib.

1980-ci il təvəllüdlü şikayətçi qan xərçəngindən əziyyət çəkdiyini və ikinci qrup əlilliyi olduğunu bildirir.

Onun sözlərinə görə, 250 manat məbləğində pensiya ailəsinin yeganə gəlir mənbəyi olub:

“Keçən aydan mənim təqaüdüm kəsilib. Dövlət Sosial Müdafiə Nazirliyinin rayon filialına getdim, pensiyamın niyə kəsildiyini soruşdum. Dedilər ki, əlillik müddətim başa çatıb”.

Ziyəddin İsmayılov müvafiq komissiyadan keçməkdə də çətinlik çəkdiyini deyir:

“Beş ildən bir ardıcıl şəkildə komissiyadan keçmişəm. İndi isə iki həftədir hər beşinci gün gedirəm, məni qəbul etmirlər. Deyirlər ki, dalağın böyük olmasa, komissiyaya gəlmə”.

Şikayətçinin sözlərinə görə, səhhəti işləməsinə imkan vermir:

“İki kilo ağırlığında nəsə götürə bilmirəm. Gün altına çıxmaq, soyuqda qalmaq olmaz. Yol gedə bilmirəm, iştahasızlıq yaranır. Dalaqda böyümə, qanla bağlı problemim var”.

Məsələ ilə bağlı Dövlət Tibbi Sığorta və Ekspertiza Agentliyindən bildirilib ki, Z.İsmayılovun əlillik müddəti 7 avqust 2026-cı ildə başa çatıb və onun əlilliyinin yenidən qiymətləndirilməsi ilə bağlı müraciəti olmayıb.

Qeyd olunub ki, bunun üçün vətəndaş qeydiyyatda olduğu poliklinikaya müraciət etməlidir. Tibb müəssisəsi tərəfindən “Forma 88” sənədi rəsmiləşdirilərsə, qanunvericiliyə uyğun olaraq Ziyəddin İsmayılovun əlilliyi təkrar qiymətləndirilə bilər.