İqtisadçıdan “TikTok”dan pul qazananlarla bağlı sərt açıqlama | Bu, ədalətsizlikdir

Azərbaycanda “TikTok” sosial şəbəkəsindən pul qazananlar vergi ödəyəcəklər.

Dördüncü Sənaye İnqilabının Təhlili və Koordinasiya Mərkəzinin icraçı direktoru Fariz Cəfərovun sözlərinə görə, Azərbaycan və “TikTok” arasında kontent monetizasiyasından əldə edilən gəlirlərin vergiyə cəlb olunması ilə bağlı danışıqlar son mərhələdədir.

Bəs bu platformanın ödədiyi vəsaitə vergi tətbiqi hansı səbəblərdən irəli gəlir? Azərbaycanda “YouTube” üzərindən də eyni formada gəlir əldə edənlərin olduğunu nəzərə alsaq, vergi tətbiqinə məhz “TikTok”dan başlanmasının səbəbi nədir?

İqtisadçı Rəşad Həsənovun sözlərinə görə, sözügedən prosesin başlaması mütləqdir:

“Biri daş qaldıraraq, ağır mədən sənayesində çalışaraq gəlir əldə edir və onların gəlirləri vergiyə cəlb olunur, amma hətta yüngül kontentlərdən belə əldə olunan gəlirlər bu gün vergiyə cəlb edilmir. Bu, ədalətsizlikdir. Sözügedən insanlar da ölkənin büdcəsinin formalaşdırılmasında iştirak etməlidir.

“TikTok”dan nə üçün başlanır?" sualına gəldikdə isə yalnız “TikTok”un Azərbaycanda rəsmi nümayəndəliyinin olması və hökumətin aidiyyəti qurumları ilə əməkdaşlığı belə bir imkan yaradıb və proses buradan başlayır. Çox böyük ehtimalla bu təcrübə növbəti platformalara da tətbiq ediləcək”.