Masallıda Vağ quşları meşədə məskən salıb

Əsasən su hövzəsi ətrafında olan vağ quşları Masallının Viləş kəndindəki meşə zolağında məskən salıb.

Sakinlərin sözlərinə görə, bu günə qədər belə hal müşahidə olunmayıb.

Qızılağac Milli Parkının böyük elmi işçisi Müstəqim Bəşirov meşə ərazisində məskunlaşan quşların əsasən ağ, boz, Misir vağları olduğunu bildirib. Onun sözlərinə görə, quşların Qızılağac Milli Parkı ərazisindən təqribən beş km aralıya yerdəyişmələrinin səbəbi qida ilə bağlıdır:

“Meşə ərazisinə yaxın yerlərdə yonca, buğda sahələri var ki, quşlar da bu sahələrə daraşan qurdlar, çəyirtkələrlə qidalanırlar. Onlar təsərrüfatlar üçün xeyirli olsalar da, meşə təsərrüfatına ciddi ziyan vurublar. Belə ki, quşların ifrazatı ağacın budaqlarını, yarpaqlarını zədələyir. Bu da gələcəkdə ağacın qurumasına səbəb ola bilər”.

Ekoloq onu da bildirib ki, vağ quşlarının yerdəyişməsi müvəqqətidir. Bir-iki aydan sonra onlar yenidən su hövzələrinə geri dönəcəklər.