Məhkəmə qapıları jurnalistlərin üzünə bağlandı | Detallar açıqlandı

İkisi azyaşlı olmaqla ailəsinin beş üzvünü amansızlıqla qətlə yetirməkdə ittiham olunan Əhməd Əhmədovun cinayət işinin 8 oktyabr saat 11:00-da keçirilməsi nəzərdə tutulan prosesi məhkəmə tərkibinin hakimlərindən biri – Əli Məmmədovun iştirak etməməsi səbəbindən qeyri-müəyyən vaxtadək təxirə salınıb. Bir neçə saatdan sonra gözlənilən prosesin saat 16:00-da başlanacağı bildirilib.

Bakı Ağır Cinayətlər Məhkəməsinin inzibati binasında gözləyən media nümayəndələri binadan çıxarılaraq 1-ci zalın giriş hissəsinə göndərilib. Proses başlayan ərəfədə icraçılar qeyri-müəyyən səbəblərdən, hər hansı bir açıqlama verməyərək bütün proses iştirakçılarını zala buraxsalar da, sonda zalın qapıları jurnalistlərin üzünə bağlanıb.

Proses başa çatdıqdan sonra təqsirləndirilən Əhməd Əhmədovun vəkili Sənan Hüseynov bildirib ki, prosesdə Əhmədin istintaqa verdiyi ifadəsi elan olunub. Bununla yanaşı, hüquqi varislər sərbəst ifadə veriblər.

Vəkil deyib ki, zərərçəkmiş şəxslərin hüquqi varislərinin təhlükəsizliyi ilə bağlı prosesə media nümayəndələrinin buraxılmaması barədə qərar qəbul edilib.

Növbəti proses oktyabrın 10-dək təxirə salınıb.