Məşhur qarmon ifaçısı Gülbahar Şükürlü vəfat etdi

Əməkdar artist, qarmon ifaçısı Gülbahar Şükürlü vəfat edib.

Bu barədə məlumatı Baku TV-yə sənətçinin yaxınları təsdiqləyib.

Qeyd edək ki, Gülbahar Şükürlü 1962-ci ildə Bakı şəhərində anadan olub. Orta məktəbi bitirdikdən sonra 4 nömrəli İncəsənət Gimnaziyasına daxil olaraq təhsilini orada davam etdirib. 16 yaşından qarmon sənəti ilə məşğul olan Gülbahar xanım el şənliklərində, məclislərdə çıxış edərək qısa müddət ərzində sevilib və şirin ifası ilə çoxlarının qəlbinə yol tapıb.

Uzun müddət Xalq artistləri Mələkxanım Əyyubova və Səkinə İsmayılova, Əməkdar artist Zöhrə Abdullayeva və başqaları ilə birgə çalışıb.

Yaradıcılıq dövrü ərzində sevilən sənətçinin 4 albomu işıq üzü görüb. 2009-cu il martın 7-də mədəniyyət sahəsində xidmətlərinə görə Əməkdar artist fəxri adına layiq görülüb.

O, uzun müddətdir xərçəng xəstəliyindən əziyyət çəkirdi.