"Ölüm yolu"nda daha bir faciə | Bu yolda niyə tədbir görülmür? - Baku TV

Sabunçu rayonunun Balaxanı qəsəbəsində, “İkinci Mədən” adlanan ərazidə yol təhlükəsizliyi ilə bağlı sakinlərin şikayətləri davam edir.

Sakinlərin sözlərinə görə, ərazidə yol hərəkətinin təhlükəsizliyinin təmin olunması üçün zəruri yol nişanları və digər infrastruktur elementləri yoxdur. Onlar xüsusilə avtomobillərin hərəkət sürətinə nəzarətin və xəbərdaredici nişanların vacibliyini qeyd edirlər.

Baku TV-nin çəkiliş qrupu sentyabrın 3-də sözügedən ərazidə olub, sakinlərin şikayətlərini dinləyərək məsələni işıqlandırıb.

Sakinlərin sözlərinə görə, reportajdan sonra ərazidə yol təhlükəsizliyi ilə bağlı hər hansı dəyişiklik baş verməyib və avtomobillərin hərəkət sürəti ilə bağlı yeni nişanlar quraşdırılmayıb.

Sentyabrın 9-da isə Baku TV-nin qaynar xəttinə həmin ərazidə daha bir azyaşlının avtomobil tərəfindən vurulmasını əks etdirən görüntü göndərilib.

Hadisənin hansı şəraitdə baş verdiyi, azyaşlının vəziyyəti və qəza ilə bağlı digər detallar barədə məlumat yoxdur. Məsələ ilə bağlı aidiyyəti qurumların açıqlaması gözlənilir.