Pedaqoji universitetin bufetində nə baş verir?

Görüntülər Azərbaycan Dövlət Pedaqoji Universitetinin bufetində lentə alınıb.

Sosial şəbəkələrdə geniş müzakirələrə səbəb olan videodakı şəxsin 3 gündür ki, bufetə daxil olub, qarşısında kitab olan bütün tələbələri qovduğu iddia olunur.

“Bufetdə oturmağa yer yoxdur. Oxu zalı var, orada oxuyun” kimi ifadələrlə tələbələri zaldan qovmağa çalışan şəxs təhsil alanların sərt reaksiyasına səbəb olub.

Deyilənlərin nə dərəcədə doğru olub-olmadığını öyrənmək üçün Baku TV-nin əməkdaşı ali təhsil ocağına üz tutub.

Baku TV-nin kameralarını görən tələbələr arasında vəziyyəti inkar edənlər olsa da, universitetin mətbuat xidməti deyilənləri təsdiqləyib. Bildirilib ki, həmin kadrlardakı şəxs universitetin inzibati departamentinin müdiridir:

“Universitetin müəllim və tələbə heyətindən dəfələrlə şikayət daxil olub ki, hər hansı qida qəbul etmədikləri halda yeməkxanadakı yerləri həddən artıq məşğul edən tələbələr var. Sözügedən səlahiyyətli şəxs isə universitetin inzibati departamentinin müdiridir. Ali təhsil ocağının infrastrukturu ilə bağlı şikayət və təkliflər həmin şöbəyə yönləndirilir. Mövcud vəziyyətlə bağlı yeməkxanadakı həmin tələbələrlə söhbətlər aparılıb. Təəssüf ki, eyni tələbələrə bu məsələ dəfələrlə izah edilsə də, bəziləri bunu anlayışla qarşılamayıb və tövsiyələrə məhəl qoymayıb”.

Cavid Hüseynov bildirib ki, tələbələr dərs barədə müzakirələr aparmaq, yaxud da mütaliə etmək üçün bufetdən yox, yüksək xidmətlərlə istifadəyə verilən oxu zalından istifadə etsələr, daha məqsədəuyğun olar.