"Bakı payızı - 35 il sonra" istedadlar müsabiqəsinə hazırlıq

Azərbaycanda 35 il sonra “Bakı Payızı” istedadlar müsabiqəsi yenidən keçirilir. Bu barədə müsabiqənin təşkilatçılarından məlumat verilib.

Bildirilib ki, musiqi və bədii təəssüratların yaradılması, bu əsasda musiqi mədəniyyətinin, üslub, ritm və ansambl hisslərinin inkişafı builki payızın əsas tədbirinə – “Bakı Payızı - 2023 - 35 il sonra” istedadlar müsabiqəsinə peşəkar hazırlığın mühüm tərkib hissəsi olacaq.

Eləcə də qeyd olunub ki, 1-ci və 2-ci turların nəticələrini yekunlaşdıran yarımfinal çıxışlarına fəal hazırlıq gedir.

“Mentorlarımız tərəfindən uğurla həyata keçirilən, saatlarla davam edən məşqlərdə gözəl aparıcılarımız fəal iştirak edir, onlar da yaradıcılıq prosesində böyük maraq və həvəslə iştirak edirlər. Ümumi yaradıcılıq birliyi ab-havasını, bayram əhvali-ruhiyyəsini yaradan müəllim və iştirakçıların gördükləri işlərdən, istedad və vokal imkanlarının reallaşdırılmasını nümayiş etdirən videoçarxlar çəkilir. Bizimlə qalın və bu möhtəşəm “Bakı Payızı - 2023 - 35 il sonra” musiqi bayramına qoşulun!”, – deyə məlumatda vurğulanıb.