"Böyüklər razılaşıb ki..." | Qubada yaşayan cütlüyün sevgi dolu həyat hekayəsi - Baku TV

Üzlərində təbəssüm, gözlərində isə sevgi var. Söhbət Qubanın Töhmər kəndində yaşayan Rəcəbovlar cütlüyündən gedir.

Onlar düz 71 ildir ömür yolunu birlikdə addımlayırlar. Sağlamlığın və xoşbəxtliyin sirrini isə sadə həyat tərzi ilə izah edirlər.

Uzunömürlü Seydi Rəcəbov həyat təcrübəsini belə ifadə edir:

“91 yaşındayam. 9 övladım var – 6-sı qız, 3-ü oğlandır. 29 nəvəm, 50 nəticəm var. Üstəlik, 3 kötücəm də dünyaya gəlib. Özümə həmişə diqqət etmişəm, düzgün qidalanmışam. Səhər yeməyimi vaxtında yemişəm. Bazardan alınan şeylərə ehtiyac olmayıb. Sağlamlıq hər insanın öz əlindədir. Tez oyanmaq, fiziki işlə məşğul olmaq vacibdir. Şəhərdə oturub hazır yemək mənlik deyil. Mənə pul da versələr, kənddən çıxmaram. Kənd mənim üçün müalicə kimidir”.

Onların tanışlığı illər öncəyə dayanır. Seydi Rəcəbov o günləri belə xatırlayır:

“O vaxt indiki kimi fırıldaqlar yox idi. Bir məhəllədə yaşayırdıq, həm qonşu idik, həm də qohumluq əlaqəmiz vardı. Qış vaxtı idi. O zaman nə maşın var idi, nə də indiki şərait. Sadə şəkildə toy etdik. İşıq yox idi, lampanın işığında toy olmuşdu”.

Seydi Rəcəbov uzunömürlülüyün sirrini isə belə izah edir:

“Xoşbəxt yaşamaq lazımdır. Qazandığım pulu həyat yoldaşıma verirdim. İndi kim qazandığını yoldaşına verir? Əgər insan həyat yoldaşına güvənmirsə, pul başqa yerə gedər. Amma bizdə həmişə etibar olub”.