"Dedilər ki, gedin, özünüzə yer tapın" - Sakinlər niyə aylardır evlərinə girə bilmirlər? - Baku TV

Paytaxtın Nizami rayonu, Əli Vəliyev küçəsi, 6 ünvanında yerləşən beşmərtəbəli binada ötən ilin avqust ayında partlayış baş verib. Hadisədən sonra 13 mənzilin sakinləri müvəqqəti olaraq kirayə mənzillərə köçürülüb.

Aradan xeyli vaxt keçməsinə baxmayaraq, bina və mənzillərdə heç bir təmir-bərpa işi aparılmayıb, sakinlər isə hələ də evlərinə qayıda bilmirlər.

Sakinlərdən biri bildirib ki, partlayışdan sonra onlara binanı üç ay ərzində təmir edib geri köçürəcəkləri vəd olunub:

“Bizi bayıra çıxarıb dedilər ki, gedin, özünüzə yaşayış yeri tapın, üç ay ərzində binanı təmir edib sizi geri köçürəcəyik. Mənim qapımın ağzı daşla doludur, içəri girə bilmirəm. Qazı söndürüblər, heç nə işləmir. Bir daşı da yerindən tərpətməyiblər. Kirayə pulunu iki ay özümüz ödədik, sonra tələb etdikdən sonra altı ayın pulunu verdilər”.

Başqa bir sakin isə yaranmış vəziyyətə etiraz edərək deyib:

“Qonşular yazıq deyilmi? Qışın bu vaxtı küçələrdə qalıblar”.

Məsələ ilə bağlı Nizami Rayon İcra Hakimiyyətindən bildirilib ki, binaya dəyən zərərin aradan qaldırılması üçün Fövqəladə Hallar Nazirliyinin müvafiq qurumları tərəfindən bərpa layihəsi hazırlanıb və baxılması üçün FHN-in Dövlət Ekspertiza Baş İdarəsinə təqdim edilib.

“Hazırda layihəyə baxılır və yaxın günlərdə müvafiq rəyin verilməsi gözlənilir. Dövlət Ekspertizasından rəy alındıqdan sonra binanın təmir-bərpa işlərinə başlanılması üçün aidiyyəti dövlət orqanlarına müraciət ediləcək”, – deyə açıqlamada qeyd olunub.