"Dedilər ki, səni bura niyə götürüblər?!" | Məlahət Abbasova Türkiyədə yaşadıqlarını danışdı - AMİN

“Amin” verilişinin yeni buraxılışında Əməkdar incəsənət xadimi Məlahət Abbasova ilə sənət və mədəniyyət mövzusu ətrafında fikir mübadiləsi aparılıb.

O, “uzunömürlü ailənin sirri nədədir?” sualını cavablandırıb.

M.Abbasovanın fikrincə, uzunömürlü ailənin sirri qarşılıqlı hörmətə bağlıdır:

“Eşq bir müddət sonra bitsə də, sevgi qalır. Lakin o sevginin daxilində hörmət yoxdursa, ailə də bitmiş sayılır. Bəzən evliliklərdə kənar təzyiqlər, uşaqlar, maddi çətinliklər və ya ictimai qınaq qorxusu insanları ayrılmağa qoymur. Amma sevginin bitdiyi, hörmətin olmadığı yerdə evlilik, sadəcə, kağız üzərində qalır”.

Əməkdar incəsənət xadimi həmçinin sənət yolunda qarşılaşdığı çətinliklərdən bəhs edib:

“Hər sabah oyananda Allaha şükür edirəm və özümü Yaradanın sevimli bəndəsi hesab edirəm. Türkiyədə teatra yeni başlayanda diksiyam zəif olduğu üçün məni üzənlər, hətta “səni bura niyə götürüblər?” deyib ağladanlar da olub. Lakin mən heç vaxt o insanlara sərt cavab vermədim, hər kəslə gülərüz davrandım. İnkişaf etmək üçün mənə ünvanlanan tənqidləri qəbul etməyi seçdim”.