“Bura mina və partlamamış hərbi sursatlarla çirklənmiş ərazidir” | Füzulidə mediatur - Baku TV

Keçmiş təmas xəttinə düşən ərazilər uzun illər müharibənin izlərini daşıyan, hər addımında mina təhlükəsi gizlənən ərazilərdir. Azərbaycan Minatəmizləmə Agentliyi (ANAMA) tərəfindən təşkil olunan mediatur zamanı Füzuli rayonunda aparılan humanitar minatəmizləmə əməliyyatları, eləcə də bəzi ərazilərin çəpərlənməsi ilə bağlı görülən işlər barədə məlumat verilib.

ANAMA-nın təmizləmə dəstəsinin əməliyyat rəhbəri Cabir Səmədov bildirib ki, çəpərlənən ərazilər keçmiş təmas xəttinə düşdüyü üçün mina və partlamamış hərbi sursatlarla çirklənmiş sahələr hesab olunur:

“Çəpərləmənin mahiyyəti ondan ibarətdir ki, keçmiş təmas xətti olan bu ərazilər çəpər daxilində qalır. Çünki həmin sahələr mina və partlamamış hərbi sursatlarla çirklənmiş ərazilərdir.

Çəpərləmənin məqsədi yaxınlıqda yerləşən kəndlərdə aparılan tikinti, quruculuq və bərpa işləri zamanı, həmçinin ferma təsərrüfatlarının fəaliyyəti çərçivəsində insanların bu təhlükəli ərazilərə daxil olmasının qarşısını almaqdır. Bu baxımdan Füzuli rayonu ərazisində ümumilikdə 91 kilometrdən artıq çəpərləmə işləri yekunlaşdırılıb”.