"İçib çöldə dava edirlər" | Məhəllədə açılan kafe sakinləri təngə gətirdi - Baku TV

Baku TV-nin qaynar xəttinə daxil olan müraciətdə şikayətçi bildirir ki, Sabunçu rayonu, Zabrat 2 qəsəbəsində bir neçə həftə əvvəl yaşayış evinin içərisində kafe fəaliyyətə başlayıb.

Sakinlərin sözlərinə görə, həmin obyektə gələn müştərilər məhəllədə səs-küy yaradır, ətrafdakı insanların rahatlığını pozurlar.

“Yaşayış massivində kafe açıblar, ictimai asayiş pozulur. Gənclərə, uşaqlara pis nümunə olur”, – deyə şikayətçilərdən biri bildirib.

Digər sakin isə qeyd edib:

“Gecə saatlarında bacım, anam bu ərazidən keçir. Hazırlıqdan qayıdanlar, işdən gələnlər var. Səs-küy olur, içirlər, çöldə dava edirlər, söyüş söyürlər. Bu, qəbuledilməz haldır”.

Məsələ ilə bağlı Sabunçu Rayon İcra Hakimiyyətinə müraciət edilib. Qurumdan bildirilib ki, həmin kafenin fəaliyyəti dayandırılıb.