"Onlarda pul çoxdur, bizdə az?!" - İllərdir həll edilməyən problem sakinləri bezdirdi - Baku TV

Baku TV-nin qaynar xəttinə daxil olan şikayətə əsasən, Suraxanı rayonu, Yeni Günəşli qəsəbəsi, Samir Cəfərov küçəsində yerləşən 13 saylı binanın bəzi mənzillərində elektrik sayğacları quraşdırılsa da, digər mənzillər heç bir əsas göstərilmədən sayğacla təmin edilməyib.

Şikayətçilər bildirirlər ki, dəfələrlə aidiyyəti qurumlara müraciət etsələr də, problem hələ də həllini tapmayıb.

“Mən dörd ildir burada yaşayıram. Mənə dedilər ki, çıxarışım və texniki pasportum varsa, Qara Qarayevdə yerləşən “ASAN kommunal”a müraciət edim, mənzilə sayğac quraşdırılsın. İki dəfə müraciət etmişəm, lakin hər dəfə imtina cavabı almışam. Səbəbini soruşanda deyirlər ki, binanın sənədlərində problem var. Əgər binanın sənədləri qaydasında deyilsə, 282 mənzilə sayğac necə quraşdırılıb? Hətta yaxın zamanda sayğac quraşdırılan iki mənzili kodları ilə birlikdə göstərə bilərəm.

Bu barədə soruşanda mənə bildirirlər ki, həmin sayğacları işıq idarəsi quraşdırıb. Guya binada yalnız bir-iki mənzilin sayğacı olmadıqda onlara sayğac quraşdırılır. Halbuki burada təxminən 20 mənzilin elektrik sayğacı yoxdur. Hamımız elektrik enerjisinə görə qeyri-əhali tarifi ilə ödəniş edirik. Mən aztəminatlı ailəyəm və işıq pulu çox gəlir. Ödənişin hara və necə hesablandığını bilmirəm. Əgər sayğacların quraşdırılması qanunidirsə, bizə də quraşdırsınlar. Qanunsuzdursa, gəlib hamısının sayğacını söksünlər və bunun qanunsuz olduğunu desinlər”, – deyə sakinlərdən biri bildirib.

Digər sakin isə beş ildir həmin binada yaşadığını və problemin həlli üçün müxtəlif qurumlara müraciət etdiklərini deyib:

“Beş ildir bu binada yaşayırıq. Elektrik sayğacının quraşdırılması üçün dəfələrlə müraciət etmiş, çoxlu mübahisələr yaşamışıq. Sonda işıq idarəsinə getdik. Oradan bizi “ASAN kommunal”a yönləndirdilər. Dedik ki, bəlkə, proseduru bilmirik, yolu göstərin, gedib məsələni həll edək. Qara Qarayevdəki “ASAN kommunal”da isə bildirdilər ki, bizə sayğac quraşdıra bilməzlər.

Əgər quraşdırmaq mümkün deyilsə, binanın yarısında sayğac niyə var, digər yarısında isə yoxdur? Bu, qanunsuzdursa, heç kəsdə sayğac olmasın. Qanunidirsə, sayğacı olmayan sakinlər digərlərindən nə ilə fərqlənirlər? Onların pulu çoxdur, bizimki azdır? Bu məsələni necə həll edəcəyimizi bilmirik”.