"Şikayət edirik, "Azərsu"nu günahlandırırlar" | Yaşayış kompleksinin sakinləri təngə gəlib - Baku TV

Xətai rayonu, Əhmədli (Kənd Əhmədli) qəsəbəsi ərazisində yerləşən "Kristal Abşeron" yaşayış kompleksinin sakinləri bir sıra problemlərdən şikayətçidirlər.

Sakinlərin sözlərinə görə, ərazidə əsas problem mərkəzləşdirilmiş su və kanalizasiya sisteminin olmamasıdır. Mənzillərə su xüsusi maşınlarla gətirilərək anbarlara boşaldılır. Bu da suyun verilməsində fasilələrin yaranmasına səbəb olur.

Bundan əlavə, kanalizasiya sisteminin çəkilməsi məqsədilə aylar öncə qazılan yollar təmir olunmayıb. Nəticədə, yayda toz-torpaq, qışda isə palçıq ərazidə hərəkəti çətinləşdirir.

Sakinlərdən biri narazılığını Baku TV ilə bölüşüb.

"Üç-dörd ildir ki, mənzillər təhvil verilib, lakin hələ də su və kanalizasiya sistemi qurulmayıb. Eyni zamanda çıxarış da verilmir. Qazılan yollar 4 aydır bu vəziyyətdədir. Məsələ ilə bağlı şikayət edəndə məsuliyyəti "Azərsu" ASC-nin üzərinə atırlar. Ərazidə abadlıq işləri aparılmır, həmçinin sahibsiz itlərin çoxluğu səbəbindən küçəyə çıxmaq təhlükəli hala gəlib", – o söyləyib.