Sahibkarların diqqətinə | AQTA rəsmisindən vacib açıqlama

Qida Təhlükəsizliyi Agentliyi ölkədə istehsal edilən və idxal olunan bioloji aktiv qida məhsulları ilə bağlı nəzarət tədbirləri keçirir.

Ölkəmizə idxal edilən bir çox bioloji aktiv qida məhsullarının istehsalçı ölkədə qeydiyyatdan keçmədiyi və həmin ölkədə satış dövriyyəsində olmadığı müəyyən edilib. Artıq bu sahədə fəaliyyət göstərən sahibkarlara ciddi xəbərdarlıq edilib.

AQTA-nın şöbə müdiri Əkbər Əliyev bildirib ki, həmin məhsulların istehsal olunduğu ölkələrdə belə satışı qadağandır:

“Həmin istehsalçılar öz ölkələrində qeydiyyatda deyil. Bu sahə ilə məşğul olan sahibkarlıq subyektləri artıq qeydiyyatla əlaqədar baş vurmalı, qanunvericiliklə tələb olunan sənədləri təqdim etməlidir”.

Xatırladaq ki, Agentlik Nazirlər Kabinetinin müvafiq qərarına əsasən, cari il iyulun 1-dən bioloji aktiv qida məhsullarının qeydiyyatı üçün müraciətlərin qəbuluna başlayıb. “Qida təhlükəsizliyi haqqında” Azərbaycan Respublikası Qanununa uyğun olaraq aparılan prosesə əsasən, qeydiyyata alınacaq bioloji aktiv qida məhsullarının qeydiyyat müddəti 5 il nəzərdə tutulur.