“Şəhidlər barədə mahnını toyda istədilər” | Asif Kərimov: “Böyük sənətkardır, amma reytinq vermir"

“Qapqara” verilişinin budəfəki buraxılışının qonağı prodüser Asif Kərimov olub.

O, müasir televiziya məkanındakı vəziyyətdən söz açıb:

“Əvvəllər istedadlı gənclər üçün xüsusi mahnılar yazır, xalq mahnılarını aranjiman edirdik ki, efirə çıxa bilsinlər. Lakin hazırda televiziyaları yalnız reytinq maraqlandırır. Hətta bir dəfə tanınmış Xalq artistinin efirə dəvət olunması üçün müraciət edəndə mənə açıq şəkildə “şəxsiyyətinə hörmətimiz var, ancaq reytinq vermir” dedilər və onu verilişə çağırmadılar”.

Asif Kərimov peşəkar sənətkarların efirlərdən kənarda qalmasının ciddi fəsadlar yaradacağını qeyd edib.

Prodüserin sözlərinə görə, bu gün ekranlarda keyfiyyət yox, qalmaqal ön plana keçib:

“Son vaxtların ən böyük problemi odur ki, harada söyüş söyən, qalmaqal yaradan varsa, məhz onları efirə çıxarırlar. Çünki bu cür şəxslər həm kanala reytinq qazandırır, həm də toy bazarına daxil olurlar. Halbuki bizim Səbinə Ərəbli kimi həm muğamı, həm də estradanı ifa edən sənətkarlarımız var. Təbii ki, onlar layiq olduqları dəyəri görmədikdə sənətdən küsüb uzaqlaşacaqlar”.