Sinif otağı şəxsi məqsədlər üçün istifadə olunub? | 182 nömrəli məktəbdə qalmaqal

Binəqədi rayonu, 182 nömrəli tam orta məktəbdə işçi heyətinin sinif otağını şəxsi məqsədlər üçün istifadə etməsi ilə bağlı yayılan videogörüntülər ciddi müzakirə mövzusuna çevrilib.

Baku TV məsələ ilə bağlı paytaxt sakinlərinin fikirlərini öyrənməyə çalışıb.

“Məktəblər təlim, tədris və tərbiyə üçün nəzərdə tutulub. Bu kimi halların olması yolverilməzdir”, – sakinlərdən biri bildirib.

“Müəllimlər öz aralarında hansısa ziyafət təşkil etmək və ya bir araya gəlmək istəyirlərsə, başqa məkanlara üz tuta bilərlər”, – başqa bir sakin qeyd edib.

Sinif otağında qeydə alınan görüntülərlə bağlı Bakı Şəhəri üzrə Təhsil İdarəsi 182 nömrəli tam orta məktəbin cavabını göndərib.

Məlumatda bildirilir ki, qeyd olunan videogörüntülər qeyri-dərs vaxtı çəkilib:

“Məktəbin texniki işçiləri və laborantlar yeni tədris ili ərəfəsində aparılan təmizlik və digər hazırlıq işlərini bitirdikdən sonra nahar etmək üçün icazə alaraq otaqda yemək yeyiblər”.

O ki qaldı bu məsələ ilə bağlı hər hansı tədbirin görülüb-görülməyəcəyinə, görüntülərdə ciddi qayda pozuntusuna yol verilmədiyinə, yəni dərs vaxtı qeydə alınmadığı üçün tədris prosesinin pozulmadığına görə qurum tərəfindən xüsusi tədbir görülməyəcəyi bildirilib.